Co-branding
Nuk mund t’i bësh të gjitha vetë, kjo është një e vërtetë që vlen si në jetën e përditshme ashtu edhe në punë. Një concept i cili ka depërtuar edhe në marketing, për të krijuar në mënyrë inovative një lloj ‘‘martese’’ midis dy lloj brandesh që arrijnë të krijojnë një përvojë të vetme. Në këtë mënyrë publiku mund të përfshihet akoma më tepër emocionalisht e në të njëjtën kohë përfitmi është më i lartë. Po bëhet gjithnjë e më e zakonshme të dëgjosh për koleksione kapsulash midis markave të ndryshme që formojnë këto bashkë-brendime duke sjellë inovacion në treg.
Por çfarë është në të vërtetë co-branding?
Co-branding krijohet kur dy ose më shumë marka tregtohen së bashku përmes formave të marketingut, ose kur disa marka kombinohen duke krijuar një produkt të veçantë së bashku, i cili arrin të përfaqësojë identitetin e të dyjave. Ky bashkim funksionon sepse ka më shumë ndërveprim, rrit besimin e klientit, krijon “dinamizëm” më të madh, dhe mbi të gjitha I jep mundësi të dyja brandeve të përfitojnë klientë të rinj.
Roli i rrjeteve sociale
Rrjetet sociale luajnë një rol vendimtar në këtë ‘bashkim’, në retrospektivë ato janë vendet e parat nga ku ndodh ky co-branding, aty fillon lançimi dhe zhvillimi i gjithë projektit të promovimit digjital. Mund të përmendim shumë shembuj të partneriteteve midis markave, si p.sh. edicionet ekskluzive të lançuara çdo vit nga H&M në bashkëpunim me marka të ndrysme si Moschino ose Morris and Co.
Kur bëhet fjalë për luks, fushatat më tërheqëse janë firmosur kryesisht nga BMW dhe Louis Vuitton: dy botë që arritën të ndërthureshin në mënyrë perfekte duke krijuar një autoveturë luksoze ku tekstura përbënte dizajnin më inovativ të markës L.V.
Kur moda takohet me ushqimin dhe pijet
Ndër markat e ndryshme që i janë bashkuar strategjive të co-branding, nuk mund të mos përmendet fillimisht Coca-Cola, e cila ka krijuar një edicion ekskluziv përkrah stilistëve më të rëndësishëm të ‘‘Haute Couture’’ (moda elitare), duke i qëndruar besnike ngjyrave dhe teksturave karakteristike të këtyre brandeve. Ndër emrat që arritën të firmosin shishen ikonë të Coca-Cola janë: Moschino, Alberta Ferretti, Blumarine, Fendi, Versace, Etro, etj. Një marëveshje te tipit co-branding, Coca-Cola e ka bërë edhe me platformën më të famshme të filmave Netflix (lexo për më tepër) duke e promovuar në episodet e sezonit të tretë të serialit “Stranger Things”.Çdo vit, që nga 2008, kompania e ujit Evian ka lançuar një koleksion ekskluziv të shisheve të saj, të nënshkruar nga stilistë të ndryshëm. I pari që u hodh në treg ishte ai i krijuar nga Christian Lacroix më vonë pasuan Jean Paul Gaultier (2009), Paul Smith (2010), Elie Saab (2014), etj. Por një nga co-brandet më të fuqishme të kësaj kompanie ishte ai i vitit 2018 kur Evian vendosi të lançonte një koleksion të firmosur nga Chiara Ferragni, e cila bëri mjaft bujë pasi çmimi i shitjes së një shishe uji gjysëm litri shkoi deri në 8 euro.
Zgjedhja e Co-branding
Vendimi për t’iu drejtuar një co-branding përfaqëson një nga alternativat më të ndjekura nga kompani të ndryshme për të identifikuar fushata të reja promovimi ose për të pozicionuar në treg një produkt të ri. Por ky proçes nuk përbëhet vetëm nga aspekte pozitive, ai ka edhe rreziqe që mund të hasen gjatë këtij bashkëpunimi. Koncepti i co-branding shumë herë mund të mos funksionojë duke dhënë rezultate negative mbi produktet. Kjo tregon se duhet të zgjidhet me shumë kujdes brandi me të cilin doni të krijoni një ‘‘martesë’’ të përkohëshme.
Statistikat e viteve të fundit na kanë treguar se co-branding që përfshin sektorët e modës me ato të ushqimit dhe pijeve, të cilat bazohen në krijimin e një stili jetese të bazuar në shije dhe estetikë, arrin të funksionoi më së miri. Lidhja e dy markave të ndryshme për të krijuar diçka unike i bën konsumatorët ta konsiderojnë këtë produkt më interesant dhe më cilësor në tregun e konkurrencës së lirë.
POSTIME TË PËRZGJEDHURA
